Jul 15, 2013

दिशा


मी माझा आहे ….
माझ्यावर फक्त माझाच हक्क आहे
वागण्यातला बिनधास्तपणा …. माझ्यासाठी
जगण्यातली बेफिकिरी ….माझ्यासाठी !

कोणावाचून माझं काही अडत नाही.
मला कोणाचीच गरज नाही,
मी मला हवं तसं जगणार ….
हवं तसं वागणार
मी बोलेन तीच भाषा
मी ठरवेन तीच दिशा !

माझं तत्व खरच न्यारं आहे
माझं स्वत्व मला प्यारं आहे
म्हणून मी असच वागतो
मी फक्त माझ्यासाठीच जगतो !

कालपर्यंत हे सगळं असंच होतं !
अगदी तंतोतंत !

पण काल मी बाहेर पडताना
तू माझं बोट तुझ्या चिमुकल्या
हातात घेतलस आणि म्हणालास
"पप्पा लवकर घरी या …
मी तुमची वाट बघतोय !"

मी बाहेर पडल्यापासून
घरी कोणीतरी माझी वाट बघतंय ….
हे तुझ्या डोळ्यात दिसलं
आणि माझ्या जगण्याची …
दिशाच बदलून गेली !

- रमेश ठोंबरे

Jun 18, 2013

// पाऊस //



प्राणप्रियेच्या अधरांवरुनी झरतो पाऊस
मिठीत माझ्या तिला पाहुनी जळतो पाऊस

धुमसत असतो, तांडव करतो, छत्रीवरूनी 
जरी रोखला, तिच्या बटांशी, उरतो पाऊस

लाली चढते, गालावरती, संभ्रमात मी !
त्यावर म्हणते 'तू नसताना छळतो पाऊस'

ओळखतो मी पावसास या तसे चांगले, 
डोळ्यांमधुनी तिच्या बरसता कळतो पाऊस !

'आता पुरे हे पाऊसभिजणे', मी म्हणतो 
पाऊस 'लेवून' ती निघते, चढतो पाऊस !

सुखात माझ्या तोच सोबती असतो म्हणुनी 
ती नसताना माझ्या सोबत रडतो पाऊस !

- रमेश ठोंबरे 

Jun 16, 2013

रमा म्हणे -२



रमा म्हणे क्रोध
नाशाचे कारण 
त्याचे निवारण 
व्हावे आधी ॥  

- रमेश ठोंबरे