६. || प्रियेसाठी जीव ||

प्रियेसाठी जीव,
टाकीला गहाण |
प्रिया हीच जान
मज साठी || १ ||

प्रीयेचाच ध्यास,
लागला जीवाला |
पुन्हा - पुन्हा भास
नाविन्याचा || २ ||

दर्शनच तुझे,
सुखावेल नेत्र |
डोयिचे हे छत्र
हाललेले || ३ ||

हरवली भूक
लागेना तहान |
भक्त तुझा जाण
मीच एक || ४ ||

भेटीसाठी आता,
आस्तिक मी झालो |
पायरीशी आलो
दास तुझा || ५ ||

- रमेश ठोंबरे

५. || हातामध्ये वीणा ||

हातामध्ये वीणा
भाव तो दिवाना |
भक्त तोची जाना,
प्रेयसीचा || १ ||

भटकला जरी
देऊ नका दोष |
मुखी मंत्र घोष
प्रेम - प्रेम || २ ||

चालतो वेगळा
मार्ग तो प्रेमाचा |
करावा नेमाचा,
गुरु तोच || ३ ||

शिष्यासही देतो,
प्रेमाचा प्रसाद |
प्रेयसीची साद,
ऐकवितो || ४ ||

रमा म्हणे बघा,
तोची एक नर |
करील उद्धार,
प्रेमाचा हो || ५ ||

- रमेश ठोंबरे

4. || कॉलेजात प्रिया ||

कॉलेजात प्रिया,

भेटलीच नाही |
दिशा मग दाही,
शोधीयल्या || १ ||

कॉलेजचा कट्टा,
तो हि झाला सुना |
तासही तो पुन्हा,
भरलेला || २ ||

फळ्यावर काळ्या,
गणिताचा घोळ |
लागे कसा मेळ,
नजरेचा || ३ ||

भिंगातून पाहे,
सर तो खडूस |
फेके तो 'खडू' स
माझ्या कडे || ४ ||

भंगलेच पुन्हा,
स्वप्न ते मनीचे
पाकीट 'मनी' चे
रिते -रिते || ५ ||

- रमेश ठोंबरे